Puntuacións na nova selectividade

Como xa se comentou noutra entrada do blog, este curso comeza un novo sistema de exames para o acceso á universidade. Este sistema consta dunha parte xeral (obrigatoria) e dunha parte específica (voluntaria).
Na parte xeral, as probas puntúanse de forma ordinaria pero, na parte específica, as notas obtidas pónderanse por medio dun coeficiente (0, 0,1 ou 0,2) en función do valor que se outorgue á materia para o acceso á carreira elexida.
Se non tes claro como se calcularía a túa nota de acceso á universidade podes consultar os casos prácticos que ofrece esta presentación elaborada pola Universidade Rey Juan Carlos de Madrid:

http://www.scribd.com/doc/24277781/pau-2010

Acceso ó Corpo Nacional de Policía

REQUISITOS PARA O INGRESO

XERAIS:

-Ser español.

-Ter 18 anos de idade e non ter cumpridos os 30.

-Estatura mínima de 1,65 metros os homes e 1,60 as mulleres.

-Compromiso de portar armas e, no seu caso, chegar a empregalas.

-Non ter sido condenado por delito doloso nin separado do servizo do Estado, da Administración Autonómica, Local ou institucional, nin atoparse inhabilitado para o exercicio de funcións públicas.

-Permiso de conducir da clase que se determine na respectiva convocatoria.

ESPECÍFICOS:

*INSPECTOR
-Estar en posesión do título de Enxeñeiro Técnico, Arquitecto Técnico, Diplomado Universitario ou formación equivalente ou superior.

*POLICÍA

-Estar en posesión ou en condicións de obter o título de Graduado en Educación Secundaria ou formación equivalente ou superior.

Para coñecer o número de prazas que se convocan cada ano, así como, o temario, as probas e outros aspectos do proceso selectivo, consulta:

http://www.boe.es/

http://www.policia.es/

Becas Erasmus

As "becas Erasmus" son axudas que se outorgan ós estudantes e profesores da UE, que cursan Estudos Superiores, para realizar estudos noutros países adscritos ó programa. Estes países son todos os pertencentes á Unión Europea mais os 3 países que forman parte do Espazo Económico Europeo, isto é, Islandia, Liechtenstein e Noruega.

Cada universidade asina acordo con outras universidades, ofertando cada ano unha serie de prazas segundo a titulación que se estude.

A duración da movilidade oscila entre os 3 meses (mínimo) e os 12 meses (máximo).

Se estás interesado en coñecer máis acerca deste programa europeo, consulta o seguinte link:

http://www.becaerasmus.com/

Distrito Aberto

¿QUE É O DISTRITO ABERTO?
O Distrito Aberto facilita que os estudantes poidan cursar os seus estudos na universidade que desexen. As universidades públicas ofrecen, en todas as súas titulacións, o 100% das súas prazas en Distrito Aberto, en igualdade de condicións para todos os estudantes, sen ter en conta o seu distrito de procedencia e o lugar no que residan.
¿COMO SE PODE SOLICITAR UNHA PRAZA POR DISTRITO ABERTO?
Se desexas solicitar unha praza nalgunha titulación doutra universidade, podes facelo cumprimentando o impreso de preinscripción que che facilitará a universidade de destino e entregalo nos prazos fixados pola propia universidade.
¿PÓDESE SOLICITAR VARIAS UNIVERSIDADES EN DISTINTOS DISTRITOS?
Si, para facelo debes encher o impreso de preinscripción de cada un dos distritos universitarios no que desexas obter praza, nos prazos que cada un deles determine.
¿QUE OCORRE CANDO SE OBTÉN PRAZA EN DISTINTAS UNIVERSIDADES?
Elíxese a que máis interese e faise a matriculación dentro dos prazos que a universidade teña señalados. Se transcorrido o prazo de matriculación non se fai efectiva a matrícula, perderase a praza adxudicada.

Help! Chegan os exames...

Cando chegan os exames, adoitan vir acompañados de nervos e atracóns de última hora. Segundo a psicóloga e orientadora educativa, Ana Torres Jack, hai unha serie de factores que propician que despois ter estudiado, o exame non saia como agardamos.

Estes factores son:
-Empezar a estudar con poucos días de antelación ou incluso o día anterior.
-Pasar a noite sen durmir.
-Non distribuir ben o tempo do exame, invertindo moito nalgunhas preguntas e deixando moi pouco ou nada para outras.
-Non contestar ó que se pregunta.
-Descoidar a redacción, a presentación ou a ortografía.
-Deixar algunha pregunta en branco.
-Entregar o exame sen darlle un pequeno "repaso".

Por outra banda, propón un DECÁLOGO para unha boa preparación dos exames:
1. Procurar non estar canso cando se pon un a estudar (débese durmir o suficiente).
2. Intentar relacionar o que estás aprendendo co que xa sabes.
3. Organizar os papeis, apuntamentos e libretas.
4. Memorizar primeiro o esquema xeral e logo os detalles.
5. Dividir a materia en bloques para abordala de forma máis sinxela.
6. Lembrar que a memoria depende, sobre todo, de 2 factores: interese e concentración.
7. Procurar entender antes de memorizar.
8. Repasar con frecuencia.
9. Empregar todos os sentidos: escribir palabras clave, mirar as fotos do libro...
10. Empregar regras mnemotécnicas ou trucos para asociar ideas.

E para momento clave do exame, esta orientadora aconsella:
-Ler ben as preguntas ata estar seguro de que se comprende.
-Consultar as dúbidas ó profesor/a.
-Facer un breve esquema ou borrador.
-Contestar ó que se pregunta.
-Vixiar a expresión: as frases han de ser claras, curtas e sinxelas.
-Coidar a ortografía, se non se sabe con seguridade como se escribe unha palabra, búscase un sinónimo.
-Cando non se está seguro dun dato concreto, é mellor non poñelo.
-Aínda que o tempo sexa moi xusto, é conveniente deixar un par de minutos para repasar o que se escribiu.

¡BOA SORTE!

Bolsas do Ministerio de Educación

Se estás realizando ESTUDOS POSTOBRIGATORIOS ou tes pensado comezalos, podes solicitar bolsa de estudos ó Ministerio de Educación.

Para poder optar ás mesmas debes cumprir unha serie de criterios ECONÓMICOS e ACADÉMICOS.

As axudas máis importantes que se contemplan son:

-COMPENSACIÓN: tratan de compensar ás familias de rentas máis baixas da desvantaxe económica que supón a dedicación ó estudo do/da solicitante de bolsa.
-DESPRAZAMENTO OU TRANSPORTE: para cubrir gastos debido á distancia entre o domicilio familiar e o centro docente onde se cursan estudos.

-RESIDENCIA: destinadas a compensar a aqueles/as alumnos/as que teñen que residir durante o curso fora do domicilio familiar.

-MATERIAL DE ESTUDOS: axuda para adquisición de libros e outro material.

-MOVILIDADE: trata de axudar a alumnos/as que realicen estudos noutras Comunidades Autónomas.

-MATRÍCULA: Axuda contemplada para estudos universitarios ou outros estudos, cando o centro onde se imparten non estea sostido con fondos públicos, dado que, no resto dos casos, o coste da matrícula adoita ser gratuíta.

O PRAZO para solicitar bolsa do Ministerio de Educación adoita abrirse a finais de curso e permanece aberto durante o verán.

Para coñecer con detalle as condicións de solicitude e os requisitos que se han de cumprir, consulta o seguinte enlace premendo no tipo de estudos que desexas cursar (bacharelato, estudos universitarios, ciclos formativos...):

http://www.educacion.es/educacion/becas-y-ayudas/para-tus-estudios.html

Revista "Toma nota" de Infoempleo

Se queres coñecer as últimas noticias sobre formación e emprego, podes consultar esta atractiva revista de forma on-line ou descargala ó teu pc.

Edítase bimensualmente e o último número publicado é o que corresponde a novembro-decembro de 2009.

O link é o seguinte:

http://www.infoempleo.com/revista-toma-nota/revista-toma-nota.asp

Guía oficial de titulacións universitarias 2009/2010

O Ministerio de Educación ven de publicar unha Guía oficial de titulacións de todas as Universidades de España. Nesta guía atoparás toda a información sobre graos, postgraos e doutorados.

A páxina inclúe un sistema de busca polo que podes filtrar a información segundo nota de corte, titulación, universidade ou Comunidade Autónoma.

Deste xeito, podes coñecer as universidades que imparten unha determinada titulación, a nota de corte do curso pasado, o número de prazas e incluso o custe por crédito.

O enlace é o seguinte:

http://www.guiauniversidades.uji.es/grados/buscador.html

¿Que é o emprego público?

O emprego público é o que ofrecen as distintas Administracións Públicas (Concellos, Comunidades Autónomas ou Estado). Para acceder a estes postos hai que superar uns procesos selectivos que, habitualmente, se coñecen co nome de OPOSICIÓNS.

Estes procesos selectivos consisten nunha serie de probas, que realizan ós aspirantes e que son avaliadas por un tribunal, para acceder a un posto na Administración Pública ou nun organismo público.

Os postos na Administración organízanse nunha serie de GRUPOS, que á súa vez, constan dunha serie de NIVEIS, segundo a complexidade das funcións e os requisitos de acceso requeridos. A organización dos GRUPOS é a seguinte:

-Grupo A1: Doutor, Licenciado, Enxeñeiro, Arquitecto ou equivalente.

-Grupo A2: Enxeñeiro Técnico, Diplomado Universitario, Arquitecto Técnico ou equivalente.

-Grupo B: Formación Profesional de grao superior ou equivalente.

-Grupo C1: Bacharelato, Formación Profesional de grao medio ou equivalente.

-Grupo C2: Graduado en Educación Secundaria Obrigatoria, Graduado escolar ou equivalente

-Agrupacións profesionais.
(En breve, coa adaptación ó Espazo Europeo de Educación Superior, o acceso ós grupos A1 e A2 será co título de grao, establecendo requisitos específicos para cada un deles).

As oposicións convócanse nos Boletíns Oficiais (da provincia, da Comunidade Autónoma ou do Estado) aínda que diversas páxinas web da Internet recompilan estes procesos selectivos, facendo máis doada a busca (páxinas dos sindicatos, das academias de preparación de oposicións...).

Para elixir oposicións, cumpre ter en conta os seguintes aspectos:

*O tipo de probas e temario.

*Se hai fase de concurso (fase na que entran en xogo os méritos do aspirante: cursos realizados, tempo traballado na Administración...).

*A titulación que se require para poder participar nas probas.

*O número de prazas.

*O tempo que se precisa inverter en preparar as probas, realizando un plano de estudos.

Á hora de enfrentarse á preparación das probas, pódese decidir entre prepararse por conta dun ou asistir a unha academia ou centro de estudos especializados.

Por último, é conveniente considerar que algúns corpos presentan CARACTERÍSTICAS ESPECIAIS porque implican un certo grao de perigosidade e teñen condicións propias de acceso. Principalmente, son:

*Corpos de seguridade do Estado (Guardia Cívil ou Policía Nacional).

*Institucións Penitenciarias.

*Forzas Armadas Profesionais.

Coñeces as Ensinanzas Especiais?

Estas ensinanzas presentan unha regulación e/ou condicións de acceso específicas polo que son tratadas de forma distinta a outros estudos máis coñecidos como, por exemplo, os de Formación Profesional.

Dentro destas ensinanzas, atópanse as seguintes:

-ENSINANZAS ARTÍSTICAS (ensinanzas de arte dramática, artes plásticas e deseño, conservación e restauración de bens culturais, danza, ensinanzas superiores de deseño e música)

-ENSINANZAS DEPORTIVAS (fútbol, fúbol sala, atletismo, baloncesto e balonmán)

-ENSINANZAS DE IDIOMAS (distinta oferta de idiomas dependendo da Escola Oficial de Idiomas ou sección das mesmas da que se trate).

No que se refire ás ensinanzas artísticas, hai estudos superiores equivalentes á diplomatura universitaria (estase a traballar, actualmente, para adaptar estes estudos ó Espazo Europeo de Educación Superior) e hai estudos equivalentes ós títulos de técnico e técnico superior da Formación Profesional.

As ensinanzas deportivas conducen á obtención de títulos de técnico deportivo e técnico deportivo superior da especialidade da que se trate.

Normalmente, tanto as ensinanzas artísticas como as deportivas teñen unha proba específica de acceso.

As ensinanzas de idiomas están estruturadas en 3 niveis: básico, intermedio e avanzado, existindo a posibilidade de realización dunha proba de nivel. Esta proba permite acreditar coñecementos previos dunha lingua de tal modo que a matriculación sexa no nivel máis axeitado.

Para saber máis deste tipo de ensinanzas, preme no enlace:

http://www.edu.xunta.es/ea

Opcións de Bacharelato

¿Que é? O BACHARELATO é unha ensinanza postobrigatoria, á que se accede co título da ESO.

¿Que modalidades se poden cursar? Existen 3 modalidades de Bacharelato:

-CIENCIAS E TECNOLOXÍA,

-HUMANIDADES E CIENCIAS SOCIAIS e

-ARTES, con dúas vías:

*ARTES PLÁSTICAS, DESEÑO e IMAXE

*ARTES ESCÉNICAS, MÚSICA e DANZA

¿Que tipos de materias se estudan?

-MATERIAS COMÚNS: aquelas que se estudan en todas as modalidades de Bacharelato.

-MATERIAS DE MODALIDADE: aquelas que se escollen dentro das ofertadas na modalidade de Bacharelato escollida, segundo a área de coñecemento dos estudos que imos realizar no futuro. Elíxense 3 materias de modalidade en cada un dos cursos do bacharelato, tendo que cursar unha de forma obrigatoria segundo a modalidade elixida. Así, por exemplo, cursando a modalidade de ciencias e tecnoloxía é obrigatorio cursar matemáticas en 1º e en 2º.

-MATERIAS OPTATIVAS: son as materias que non están ligadas, en concreto, a ningunha modalidade, por exemplo, a segunda lingua estranxeira. Elíxese 1 materia deste tipo (tamén se pode escoller unha cuarta materia de modalidade, no lugar desta optativa).

Para coñecer as materias do bacharelato e as normas que regulan o mesmo, preme no enlace que segue:

http://ciug.cesga.es/marcoloe.html (plan de estudos do Bacharelato LOE en Galicia)

Elixir profesión

Decidir a que SECTOR PROFESIONAL nos gustaría dedicarnos é difícil porque moitas ocupacións son descoñecidas para o público xeral.
Calquera sabe que fai un médico porque temos empregado os seus servizos e porque estamos familiarizados coa súa labor grazas a numerosas series televisas ("Urgencias", "House"...) pero, ¿que fai un enxeñeiro en obras públicas, un procurador ou un analista de mercados?.
Para saber que actividades realiza, que estudos dan acceso ou que aptitudes hai que ter para dedicarse a unha determinada ocupación, visita os seguintes enlaces (podes buscar por orde alfabética, por temática ou simplemente curiosear entre as distintas actividades profesionais):

http://www.eligeprofesion.org/
http://www.educastur.princast.es/fp/hola/pil_col/perfiles/index.php

Residencias xuvenís dependentes da Consellería de Traballo e Benestar

A Consellería de Traballo dispón de instalacións que, durante o curso académico, funcionan como residencias xuvenís para estudantes de ata 30 anos, matriculados en ciclos formativos de grao medio e superior, bacharelato, estudos universitarios ou estudos superiores de ensinanzas artísticas.

A convocatoria de prazas faise a través do DOG e pídense os seguintes requisitos:
-Posuír a nacionalidade española ou ser nacional dun país membro da Comunidade Europea, ou ser estranxeiro residente en España no momento da solicitude da praza.
-Non superar os 30 anos de idade antes da data en que remate o prazo de presentación de solicitudes.
-Que no concello onde radique a súa residencia familiar non exista oferta de centros públicos para realizar o curso, nivel ou grao correspondente ós estudos que vai cursar o/a solicitante.
Exceptúase do anterior, a realización de estudos universitarios nos que o solicitante non acade a nota de corte ou puntuación académica esixida para o ingreso nas facultades ou escolas universitarias da localidade da residencia familiar.
-Non ter perdido a condición de residente por causa imputable ó solicitante.

Os centros residencias están en Ourense (Residencia Florentino López Cuevillas), Vigo (Residencia Altamar) e Lugo (Centro Residencial Xuvenil LUG).

Nas residencias ofrécese aloxamento e mantenza, ademais dunha serie de actividades e convivencias educativas.

Máis información en:
http://residenciasmocidade.es/

Centros Residenciais Docentes

Os Centros Residenciais Docentes ofrecen aloxamento a alumn@s de ensinanza secundaria postobrigatoria non universitaria (isto é, BACHARELATO e CICLOS FORMATIVOS) que desexen realizar estudos que non se ofertan no lugar no que viven.

Estas residencias dependen da Consellería de Educación e Ordenación Universitaria e, dependendo do nivel de ingresos familiar, a estancia pode ser gratuíta ou de prezo económico.
As solicitudes de admisión realízanse en torno ó mes de xuño, cando sae publicada a convocatoria de prazas no DOG. Hai centros residencias docentes en Vigo, A Coruña e Ourense.
Para obter máis información e coñecer os servizos destes centros podes acceder ás páxinas webs dos mesmos:

http://centros.edu.xunta.es/credovigo
http://centros.edu.xunta.es/credocorunaos.edu.xunta.es/credocoruna
http://credoourense.com/

Aspectos máis valorados polas empresas...

Segundo un estudo elaborado pola Cámara de Comercio e Industria de Madrid e a Fundación Universidad-Empresa, os aspectos máis valorados polas empresas para seleccionar un candidato son: coñecementos de inglés, experiencia obtida mediante prácticas en empresa e coñecementos de informática.
O citado estudo tamén reflicte que os titulados universitarios máis contratados son os enxeñeiros e profesionais das Ciencias Sociais e Xurídicas.
No que respecta á Formación Profesional, as áreas máis demandadas son: Electricidade/Electrónica, Administración e Informática.
Podes consultar a noticia completa, no seguinte link:
http://www.educaweb.com/noticia/2009/10/12/saber-ingles-informatica-haber-realizado-practicas-son-aspectos-mas-valorados-al-seleccionar-candidatos-trabajo-216384.html

De todos modos, hai que ter en conta que os sectores con máis emprego varían segundo a zona xeográfica e a época da que se trate, polo que deben tomarse este tipo de estudos de forma orientativa.

Programas de Cualificación Profesional Inicial

Estes programas teñen como finalidade de evitar o abandono dos estudos antes da finalización da escolarización obrigatoria.
Os OBXECTIVOS do programa son:
-Adquirir competencias propias dunha cualificación profesional de nivel I (da rama profesional que se elixa), de tal modo que se mellore o acceso ó mercado laboral.
-Ampliar as competencias básicas para continuar os estudos cursando:
*Ciclos formativos de grao medio, presentándose á proba de acceso.
*Módulos conducentes á obtención do título da ESO (modulos voluntarios ou 2º curso do PCPI).

As CONDICIÓNS DE ACCESO son:
-Ter entre 16 e 19 anos (excepcionalmente, 15 con informe positivo do centro educativo)
-Non ter acadado o título da ESO (por dificultades de aprendizaxe, necesidades educativas especiais...).

Os MÓDULOS ou materias que se estudan son:
OBRIGATORIOS (1er curso):
-Específicos (relativos a un perfil profesional).
-Formativos de carácter xeral (competencia comunicativa e dixital, sociedade e ciudadanía, científico-matemático e iniciativa persoal e laboral).
VOLUNTARIOS (2º curso):
-Módulos conducentes á obtención do título de graduado en ESO (ámbitos: comunicación, social e científico-tecnolóxico).

En PONTEAREAS impártense no curso 2009/2010 os seguintes Programas de Cualificación Profesional Inicial:

IES Pedra da Auga
-PCPI de servizos administrativos (modalidade A*)
-PCPI de instalacións electrotécnicas e de telecomunicacións (modalidade A)


CIFP A Granxa
-PCPI Xardinaría e viveirismo (modalidade A)

*Nesta modalidade de PCPI prepáranse os distintos módulos, prácticos e teóricos, no instituto e, unha vez aprobados estes, realízanse as prácticas nunha empresa do sector profesional para o que prepara o Programa.

Opcións desde 3º de ESO

Ata 3º da ESO, apenas hai posibilidade de elección no sistema educativo salvo para aqueles alumnos con dificultades de aprendizaxe que, cumprindo unha serie de requisitos, poderán acceder a un Programa de Cualificación Profesional Inicial ou a un Programa de Diversificación Curricular.

Sen embargo, a partir de 3º da ESO, ábrense unha serie de vías entre as que podes escoller, segundo os teus intereses e as túas aptitudes.

As distintas opcións atópanse esquematizadas no seguinte gráfico (fai click sobre o debuxo para aumentar o seu tamaño):

Graos universitarios implantados no curso 2009-2010

No presente curso académico, 2009-2010, entraron en vigor, en moitas facultades e escolas, os novos estudos de GRAO, é dicir, estudos adaptados ó Espazo Europeo de Educación Superior.
Consulta os estudos de grao xa implantados en Galicia (en torno ó 60%), nos seguintes enlaces:

http://www.xunta.es/Dog/Dog2009.nsf/FichaContenido/33CAE?OpenDocument

http://www.xunta.es/dog/Dog2009.nsf/0e5fb445f3681a75c1257251004b10d7/d561d8b6872c364bc125766a0057a998/$FILE/22100D001P006.PDF

Oferta de ciclos formativos

Se queres coñecer os perfís profesionais que se adquiren na Formación Profesional, así como os centros educativos nos que se imparten os distinos ciclos formativos, podes consultar a información no seguinte link:

http://www.edu.xunta.es/fp/folletos.htm

Os ciclos formativos atópanse agrupados en FAMILIAS PROFESIONAIS segundo o ámbito profesional ó que estean dedicados. Dentro de cada familia, hai ciclos formativos de GRAO MEDIO, ós que se pode acceder co título da ESO ou proba de acceso, e ciclos de GRAO SUPERIOR, ós que se pode acceder co título de Bacharelato ou proba de acceso.

Nova selectividade

No actual curso, 2009/2010, entra en vigor un novo modelo de selectividade, que constará dunha fase XERAL obrigatoria (4 probas de materias comúns e 1 proba de materia de modalidade) e dunha fase ESPECÍFICA opcional (2 probas de materias de modalidade elexidas polo estudante).

A fase xeral superada (nota superior a un 5) permite ó acceso á Universidade mais, no caso de querer acceder a unha carreira con límite de praza, será necesario presentarse a fase específica, a cal permite mellorar a nota obtida na fase xeral.

Nesta fase específica, non todas as materias serán valoradas do mesmo xeito, algunhas materias serán ponderadas con 0,1 e outras con 0,2 (polo que a nota a sumar á fase xeral será menor no primeiro que no segundo caso). As materias que serán máis valoradas serán aquelas que teñan maior relación coa rama de coñecemento á que pertenza a/as titulación/s á/ás que pretendemos acceder.

Os valores de ponderación das materias de modalidade do bacharelato PARA ESTE CURSO, 2009/2010, podense consultar no seguinte link:
http://ciug.cesga.es/marcoloe.html

Notas de corte de acceso á Universidade 2008-2009

No seguinte enlace podes consultar as notas de corte (nota do últim@ alumn@ que accedeu á esa carreira) nas titulacións con límite de plaza do SUG.
http://ciug.cesga.es/marcoacceso.html

No top ten da listaxe (convocatoria de xuño e por opción preferente) séguense atopando as carreiras do ámbito sanitario (mediciña, odontoloxía, fisioterapia e enfermaría) e as relacionadas co traballo nos medios de comunicación (xornalismo e comunicación audiovisual).

Destaca, tamén, no posto número 8 a doble titulación de Dereito e Administración e Dirección de Empresas, que se imparte na Universidade de A Coruña.

Benvidos ó blogue de orientación!!

Practicamente desde que comezamos o instituto temos que empezar a tomar decisións e para poder decidir necesitamos información. A maioría da información que necesita un estudante de Secundaria está disponible na rede mais, ¡hai que saber atopala!.

Este blogue xurde para intentar facilitar este proceso e servir de "taboleiro de anuncios virtual".

¡Moita sorte na túa busca!